STELLA

Her name na Stella

Her skin black like ebony

Her mouth red like udara

Her teeth white well well

When she smile e be like say

Sun wan shine for night

She get two broda

De live with her papa wife

Her mama leave am

Go follow wata husband

Her papa wife de wicked am

Her broda dem de wicked am

Stella, go stream fetch wata

Stella, go bush fetch firewood

Stella, go drop my load for market

Stella, go cook de fufu

Stella, go bring my food

Stella, go wash my cloth

Stella go smile her sweet smile

She go laugh with dem de go

De sing de go de message

She small pass me

But she strong pass me

I de look am say she de suffer

When she reach to born pekin

Na so everybody wan marry Stella

No one de come marry me o

Dem talk say I de too lazy

Na only so so book I de read

Then I go go de watch Stella

I don read come be lawyer

Stella no finish primary school

Dem marry am quick quick

If you see Stella she still de smile

She don born six pekin dem

De happy for her husband house

Me I leave my husband te te

Im marry me say I get belle

My children sef de university

For night na so so book I de read

De write de thing wei de my mind

Stella de look me say I de suffer

© Lesley Gene Agams       February 9, 2006